Во 22 часот по локално време, затворени се избирачките места за вонредните парламентарни избори во Британија, а според пишувањето на британски „Телеграф“, се очекува приливот на резултати да трае до два часот после полноќ, а конечна, јасна слика за победникот да се добие до пет часот наутро.
Во Британија утринава со засилена безбедност беа отворени избирачките места за вонредните парламентарни избори кои се одвиваат во сенка на двата терористички напади, кои се случија во предизборната кампања, а резултатот од гласањето ќе одреди кој ќе ја обликува иднината на Обединетото Кралство после истапувањето од Европската унија, оценува агенцијата АФП.
Британците до 22 часот, по локално време, се определуваа меѓу 3.303 кандидати во 650 изборни окрузи ширум земјата, што значи дека за апсолутно мнозинство во Долниот дом на парламентот се потребни 326 пратеници.
Во трката се главните партии – Конзервативната партија на десниот центар, на чело со премиерката Тереза Меј, и левичарската Лабуристичка партија која ја предводи Џеремо Корбин. По нив следат Либерално-демократската партија на левиот центар, потоа популистичката и евроскептична Партија за независност на Обединетото Кралство и лево ориентираната Зелена партија.
Непосредно пред гласањето, истражувањата на јавното мислење покажуваа дека трката впрочем може да биде исклучително тесна од предвидувањата кога Меј ги распиша изборите пред шест недели, но и наговестуваатдека нејзината позиција на премиер – останува сигурна.
Додека според некои најнови анкети владеачката партија предничи во однос на лабуристите за само еден процентен поен, некои предвидуваат дека конзервативците дури и нема да освојат мнозинство, што би значело дека за да владеат би им била потребна поддршка од уште една партија.
Кралицата Елизабета Втора после прогласувањето на победникот, што е можно побрзо, ќе побара од лидерот на партијата која има најмногу изгледи за обезбедување на мнозинство во Долниот дом на парламентот, да стане премиер и да ја формира новата администрација.
Парламентот на 13 јуни ќе се состане за да избере свој нов претседател, а тогаш пратениците ќе положат заклетва.
На 19 јуни кралицата официјално ќе го прогласи почетокот на работата на новиот парламент, кога ќе ја прочита програмата на новата влада за престојната парламентарна година.
