До 31 декември оваа година, владата на Словенија ќе мора барем да го преполови сопствеништвото во НЛБ групацијата, а како што наведуваат извори од словенечкото Министерство за финансии, тие ќе сторат се што е во нивна моќ да ја спречат продажбата на компанијата чии банки во Македонија, Србија, Црна Гора и БиХ.
Словенија мора, во склад со обврските кон Европската комисија, превземени во замена за државна помош во 2013 година, да го намали уделот во сопственичката структура на НЛБ, каде што е стоотстотен сопственик.
Динамиката подразбира до 31 декември оваа година сопственоста да биде барем 50 отсто, а се предвидува продажба и уште 25 отсто плус една акција, кон крајот на 2018 година.
„Ако Словенија до крајот на 2017 година не продаде најмалку половина од сопственоста на НЛБ, комесарот поставен од страна на Европската комисија, во рамки на одлуката за државна помош во 2013 година, има непречено право да продаде некои од компаниите кои се сопственост на НЛБ на Балканот. Министерството за финансии поради тоа веќе тргна со преговори со ЕУ со цел пронаоѓање на најадекватни решенија. Ние ќе сториме се што е до нас, се што е во наша моќ, да ја сочуваме целовитоста на НЛБ како компанија со силна регионална банкарска групација“, истакнуваат извори од словенечкото Министерство за финансии.
Кои компании сопственост на НЛБ би можеле да бидат продадени во овој момент не се открива.
Да потсетиме, пред четири години Словенија ја договори приватизацијата на НЛБ, откако најголемата словенечка банка беше докапитализирана со буџетски средства.
Банката која е во стопроцентна државна сопственост поради државната помош во процесот на нејзината санација, кога е докапитализирана со 2,7 милијарди евра, треба да се приватизира така што државата ќе задржи само 25 отсто од акциите, а останатото да го продаде со јавна понуда, и тоа во две фази: 50 отсто до крајот на оваа година и уште 25 отсто плус една акција до крајот на идната година.
Владата, меѓутоа, постапката ја запре правдајќи се дека минималната цена на акциите на НЛБ не е адекватна, а како ризик го наведува и прашањето на девизните депозити во Хрватска.
