Во Владата на Република Македонија денеска ќе бидат одржани тематски консултации за областите кои се битни во процесот на креирање политики согласно Итните реформски приоритети.
Тематските консултации се согласно определбата на Владата за транспарентност во работата и вклучувањето на граѓанското општество во процесот на креирање политика, а поаѓајќи од важноста на процесот на европска интеракција, соопшти владината прес-служба.
На дебатата воведно обраќање ќе има претседателот на Владата, Зоран Заев, и вицепремиерот задолжен за европски прашања, Бујар Османи, а ќе присуствува и министерот без ресор задолжен за комуникации, отчетност и транспарентност, Роберт Поповски.
Вицепремиерот Османи во понеделникот најави дека Владата подготвува Акциски план со мерки и активности кои треба да се преземат во контекст на евроинтеграциите, а кои ќе му бидат презентирани на еврокомесарот Јоханес Хан за време на неговата посета на Скопје во понеделник.
Во Македонија веќе престојува и германскиот експерт, поранешен директор на Директоратот на проширување на ЕУ, Рајнхард Прибе, кој во наредните денови ќе има средби во владини претставници за Итните реформски приоритети, како и за акцискиот план за Владата за нивно спроведување.
