„Владата ќе ги промени имињата на аеродромот ‘Александар Велики’ и автопатот ‘Александар Македонски’“, најави првиот човек на македонската влада, Зоран Заев, на заедничката прес-конференција со претседателот на владата на Грција, Алексис Ципрас.
Заев откри дека новото име на автопатот ќе биде „Пријателство“, а не спомена име за аеродромот. Рече дека е време да се пронајде решение за спорот за името на земјата кој трае веќе 25 години, а што ќе биде прифатливо за двете страни и ќе ги штити националниот интегритет и дигнитет на двата народи.
Во рамките на прес-конференцијата тој посочи дека Македонија останува силно посветена на имплементација на мерките на доверба помеѓу двете земји и најави продолжување на преговорите со Грција на ниво на министрите за надворешни работи, а под медијаторство на Метју Нимиц.
Претседателот на владата на Грција, Алексис Ципрас, пак, на заедничката прес-конференција со премиерот Зоран Заев во Давос најави дека преговарачкиот процес се приближува кон крајот и истакна дека заедничкото решение треба да е ерга омнес.
„Денес многу луѓе нè гледаат од двете земји – едни со скептицизам и загриженост, други со оптимизам. Го кажувам ова бидејќи нашата цел не е само да го решиме спорот за името, туку и билатералните односи да ги поставиме врз основа на заемна доверба. Мора да најдеме решение за сите нерешени прашања“, рече Ципрас и додаде дека позицијата на Грција е исчекор напред за обезбедување стабилност и изнаоѓање решенија.
