Победата на Израел на натпреварот за Песна на Евровизија 2018 година е загрозена откако една од најголемите светски музички компании се закани дека ќе ги тужи композиторите на израелската песна поради наводни повреди на авторските права.
Компанијата Јуниверзал мјузик студиос (Universal Music Studios) од САД им испрати писмо пред тужба на Дорон Медалие и Став Бегер кои заедно ја компонираа победничката песна на Нета Барзилаи „Toy“, тврдејќи дека таа е копија од хитот „Seven nation army“ на групата Вајт страјп (White stripe) од 2003 година, јавуваат израелските медиуми.
Ако тврдењето се докаже на суд, Евровизија би можела да го дисквалификува Израел од натпреварот и да му ја одземе победата, како и правото да биде домаќин на Песна на Евровизија 2019, јави израелската телевизија Хадашот њуз.
Според правилата на Евровизија, натпреварувачките песни мораат да бидат оригинал.
Многумина забележале дека двете песни имаат сличност, но адвокатите на музичката компанија тврдат дека сличноста во ритамот и хармонијата претставуваат повреда на авторските права.
Новинарот Харека Бен Шалев пишуваше во март годинава дека „Тоу“ потсетува на американската композиција „Seven nation army“, изразувајќи надеж дека авторот Џек Вајт нема да слишне за ова пред натпреварот затоа што би можел да поднесе тужба.
Композиторот Медалие кој ја потврдил веста за можна тужба, патува денеска во САД да се обиде да ја реши, како што пишуваат новинарите во Израел, големата криза.
Официјалните лица на американската компанија, наводно, се многу одлучни, наведува Хадашот њуз, повикувајќи се на извори вклучени во случајот.
Тие велат дека дури и ако се постигне договор, Европската радиодифузна унија може да каже дека песната не е оригинална и дека затоа не е квалификувана за натпревар.
Композиторите на израелската песна велат дека писмото ги изненадило, но дека се уверени дека можат да најдат компромисно решение.
Ова е најнова препрека која се појави и која би можела да го оневозможи Израел следната година да биде домаќин на натпреварот после повикот за бојкот ако тоа би се оджало во Ерусалим.
