Многумина се прашуваа што ќе стори Герет Саутгејт во Русија без Вејн Руни, Џо Харт, Адам Лалан, Крис Смолинг, Џек Вилшир… кога некогашниот штопер го објави конечниот список на „Гордиот Албион“ за Светското првенство. Но, по влезот во полуфиналето мораа на младиот селектор да му симнат капа. Медиумите одат чекор понатаму и пушуваат „Англија ја сонува 1966“, тврдејќи дека играта и квалитетот кои ги покажа Англија можат да бидат доволни за да се победи Хрватска и да се обезбеди големото финале во Москва на 15 јули.
„Мојот татко не бил роден кога последен пат сме играле во финале на Мундијалот. Ние не сме оптеретени со историја. Од почеток рековме дека сакаме да направиме наша историја, одиме од натпревар во натпревар и ништо не е невозможно. Ќе се подготвиме за средбата со Хрватска и ќе се обидеме уште еднаш да ги направиме Англичаните горди“, изјави голманот Џордан Пикфорд.
Капитенот Хари Кејн не го подобри голгетерското конто, но ќе има барем два натпревари да го направи тоа.
„Способни сме да го менуваме начинот на игра. Сето тоа оди во корист на конечниот резултат и немам ништо против што против Шведска бев нешто подалеку од голот. Го чекаме големиот натпревар во полуфиналето. Хрватска покажа тимски карактер и квалитет, но ние сме мирни, имаме самодоверба и подготвени сме уште неколку пати да ја израдуваме Англија“, рече Кејн.
Од ноември 2016 година, кога Фудбалскиот сојуз на Англија му го тргна префиксот „в.д.“ и му даде четиригодишен мандат, поранешниот дефанзивец на Астон Вила и Мидлсборо правеше тим не осврнувајќи се на разните коментари од страна.
„Неверојатно е чувството, се надевам дека народот дома уживаше во нашите победи исто како и ние тука. Не го изгубивме фокусот, атмосферата и големата желба. Оваа екипа ја чека секако најтеѓкиот испит до сега, полуфиналето на Мундијалот е голем домен, но не мора да биде и конечен“, истакна Саутгејт.
Англија, факт е, игра малку чудно, но на овие играчи тоа најверојатно многу им одговара. Резултатите го покажуваат тоа. Саутгејт е првиот менаџер на Англија кој после Боби Робсон во 1990 година успеа да се пласира во полуфинале на Светското првенство.
Деле Али: Ние веруваме
Деле Али конечно против Шведска покажа дел од репертоарот од Тотенхем. Вториот најмлад стрелец на Светското првенство за Англија, после Мајк Овен (18 години на СП во 1998 година), не го крие одушевувањето.
„Неверојатно е чувството да се постигне гол на Мундијал, а посебно кога на својата репрезентација ќе и донесете победа. Конечно сум задоволен со својата игра, беше најдобра до сега и ми дава уште повеќе енергија и потстрек за полуфиналната средба. Направивме голем успех, но ние веруваме дека можеме да играме во Москва, во големото финале.“
