Германскиот канцелар, Олаф Шолц, денеска отпатува за Бразил за да се сретне со новиот претседател Луис Инасио Лула да Силва.
Бразилија е последната станица на канцеларот на четиридневното патување по Јужна Америка. Беше и во Чиле и во Аргентина.
Шолц е придружуван од деловна делегација со десетина менаџери и претставници на здруженија.
Со својата посета тој сака да му даде нов импулс на договорот за слободна трговија меѓу Европската унија и јужноамериканската конфедерација Меркосур, која ја сочинуваат Бразил, Аргентина, Уругвај и Парагвај.
На дневен ред ќе бидат и климатските акции и заштитата на прашумите.
ЕУ преговара за трговски договор со државите од Меркосур од 1999 година. Начелна спогодба беше постигната во 2019 година, но некои прашања се уште се отворени, особено она во врска со заштитата на прашумите на Амазон, чии огромни делови се исчистени за сточарство и земјоделството.
Германскиот претседател Франк-Валтер Штајнмаер беше во Бразил на инаугурацијата на Лула на 1-ви јануари.
Десничарскиот претходник на Лула, Жаир Болсонаро, значително ја изолираше земјата од меѓународната заедница. Левичарскиот политичар Лула не беше познат по своите зелени политики за време на неговите први два мандата помеѓу 2003 и 2010 година, но сега тој вети дека ќе даде приоритет на заштитата на животната средина и климата.
(Фото: АФП)
