„Во текот на предизборната кампања во 2021 година ветивме важни животни работи. Немавме нереални и популистички ветувања. Не ни беше цел да ги замајуваме нашите соседи и пријатели. Сакавме и ставивме точка на политичката апатија, ставивме точка на дотогашната незаинтересираност, и на летаргичноста и рамнодушноста на тие пред нас кон граѓаните“, вели Сашко Комненовиќ, градоначалник на Општина Чучер-Сандево.
Комненовиќ истакнува дека нему не му била целта некаква празна политичка пропаганда, туку реализација на она што им било од суштинско значење на жителите на општината.
Вели оти со својата конкретност и оперативност го намалил јазот меѓу програмската понуда и нејзиното реализирање.
„Ја градиме Општината. Градиме иднина. Целта ни е да ја запреме миграцијата, да го запреме иселувањето. Во што и успеваме …..“
Сашко Комненовиќ
„Отсекогаш бев противник на политичките ветувања кои после избори не се исполнуваат и за кои никој не носи каква била одговорност. Затоа, веднаш по превземањето на општинската власт, ја ставивме изборната програма на маса и тргнавме во нејзина реализација“, истакнува Комненовиќ.
Големо било, посочува тој, разбирањето на власта за потребата за развој на нивната Општина.
„Во создавањето услови за подобар живот на жителите на Општина Чучер Сандево, посебно на младите, со финансиска помош од владата и владините агенции, и со знаење и умеење на општинското раководство, на 4.653 метри квадратни изградивме и реконтруиравме шест игралишта, за што се потрошија 23,545,000 денари. Направивме две нови игралишта, едно фудбалско во училиштето „Александар Урдаревски“ и едно за кошарка во Сандево, и уште едно во Чучер. Во Глуво, Кучевиште и Побожје ги реконструиравме постоечките спортски терени. За младите во Општината го градиме и Партизанскиот дом за култура“, вели градоначалникот Комненовиќ.
Чучер Сандево навистина не е тоа што некогаш беше. Од ден на ден станува се помодерна општина.
„Станавме препознатлива општина. Направивме многу инфраструктурни работи, градиме иднина. Целта ни е да ја запреме миграцијата, да го запреме иселувањето. Во што и успеваме. Потикнавме многу млади да останат тука, дури и да се доселуваат, што ни влева дополнителен елан да продолжиме уште посилно кон реализација и на други проекти“, истакна Комненовиќ.
