Русија покрена серија ракетни напади врз Киев, Харков и Павлорад денеска рано утринава, а украинските медиуми известуваат дека се оштетени станбени згради и дека се убиени најмалку пет лица, додека повеќе од 40 се ранети.
Едно лице загина, а најмалку 18 лица се наводно повредени во главниот град.
„Една жена е убиена“, изјави Серхиј Попко, шеф на градската воена управа.
„Тринаесет се однесени и задржани во болница, а на пет лица, меѓу кои и едно 13-годишно момче, им била укажана помош на лице место“, изјави градоначалникот на Киев, Виталиј Кличко, на неговиот канал на Телеграм.
Една жена е испратена на одделението за интензивна нега, додаде градоначалникот.
„Повеќето од жртвите се од киевскиот кварт Соломјански, каде што во нападот беше уништен влез во повеќекатница“, рече Кличко.
Во една од станбените згради во тој кварт е пронајдена неексплодирана боева глава, што доведе до евакуација на станарите.
Ракетите, исто така, погодија и една двокатна деловна зграда во областа Печерски во главниот град.
Во округот Свијатошински во Киев, се запалија паркирани автомобили откако проектил падна на улица меѓу станбени згради.
Во погодените области делумно е прекинато снабдувањето со електрична енергија и вода, додека екипите на терен прават максимални напори да ги вратат услугите за загрозените.
Руските сили, исто така, извршија голем ракетен напад и врз Павлорад, во Днепропетровската област, извести гувернерот Серхиј Лисак, додавајќи дека најмалку едно лице загинало, а уште едно е повредено.
Олех Сињехубов, гувернерот на Харков, соопшти дека во руските напади врз тој град е оштетена цивилната инфраструктура.
Во нападот, наводно, биле убиени две жени, од кои едната имала 59 години. „Околу 11 лица се хоспитализирани, меѓу кои и едно 10-годишно девојче. Две жени се во тешка состојба“, рече Сињехубов.
(Фото: Скриншот „Х“)
