Бруто домашниот производ (БДП) во земјите од еврозоната во последниот квартал лани бележеше стагнација и изнесуваше нула во однос на третиот квартал кога беше евидентиран пад од 0,1%, со што е избегната рецесија, покажуваат податоците објавени денеска од Еуростат, европската статистичка агенција.
„Дваесетте земји кои ја користат единствената европска валута лани забележаа раст на економската активност од 0,5% во однос на 2022 година“, соопшти агенцијата.
Ова е нешто помалку од растот од 0,6% што го предвиде Европската комисија во најновите прогнози во ноември.
Европската економија минатата година беше погодена од високите камати што ги воведе Европската централна банка за да ја смири високата инфлација. Намалувањето на кредитите влијаеше врз инвестициите и потрошувачката на компаниите и домаќинствата, додека извозот беше под влијание на забавувањето на светската побарувачка.
Како резултат на тоа, еврозоната падна во стагнација и растот на БДП-то се движеше околу нулата во текот на годината, плус 0,1% во периодот од јануари до март, плус 0,1% од април до јуни, а потоа забележа пад од 0,1% и нула отсто во последната четвртина.
Некои земји поминаа подобро. Шпанија, поттикната од туризмот, забележа раст од 2,5% на годишно ниво, а Франција со раст од 0,9% беше над просекот.
Наспроти тоа, Германија, водечката светска економија, забележа пад на БДП од 0,3%, погодена од кризата во индустрискиот сектор, кој трпи поради високите трошоци за енергија.
Европската комисија во февруари треба да ја објави прогнозата за економскиот раст за оваа година. Досега предвидуваше раст на БДП од 1,2% за еврозоната.
Но, европскиот комесар за економија, Паоло Џентилони, предупреди дека геополитичките тензии на Блискиот Исток го зголемуваат ризикот прогнозата за растот да се ревидира надолу.
