Конфедерацијата на италијанска индустрија Конфиндустрија (Confindustria), организација која ги застапува италијанските компании, денеска во Скопје го промовираше своето претставништво што го отвори во Македонија.
Претседателот на Конфиндустрија Македонија, Марко Маркони посочи дека претставништвото е основано со цел да биде адреса за сите италијански претприемачи што бараат бизнис партнери во Македонија.
„Цел ни е да ги помагаме македонските и италијанските прептриемачи и да ги промовираме активностите на нашите членки, рече Маркони.
Италијанскиот амбасадор Карло Ромео рече дека Конфиндустрија е асоцијација која ги претставува производствените и претпријатијата за услуги во Италија во која има близу 150.000 членови од сите големини со 5,4 милиони вработени. Централното седиште и е во Рим, има 241 територијална канцеларија и здруженија, а од 1958 година има и постојано седиште во Брисел кое има за цел да ги застапува италијанските компании пред европските институции.
„Дојде моментот да направиме асоцијација за италијанските претпријатија кои се присутни во Македонија каде има 130 компании со италијански капитал од кои 40 се активни. Во 2016 година Италија е на 13. место по бројот на инвестиции во земјава со 107,6 милиони евра, рече Ромео.
Нагласи дека италијанските инвестиции во Македонија имаат комплексна димензија поради високиот квалитет на производите што се произведуваат во земјава и додаде дека постои можност за зголемување на инвестициите и на трговската размена меѓу двете земји.
Вицепремиерот за економски прашања Кочо Анѓушев рече дека Италија е значаен трговски партнер на Македонија, со вкупна трговска размена во првите девет месеци од 2017 година од 367 милиони евра, што ја рангира на шестото место во однос на економската соработка.
„Владата е посветена на зголемување на соработката со компании од развиените земји, како што несомнено е и Италија и се надевам дека во годините кои следат порастот на економската соработка ќе биде процентуално изразен во двоцифрени бројки. Во изминатите девет месеци трговската размена помеѓу земјите забележа пораст од 6,6 отсто, а особено е значајно што извозот бележи пораст од 7,5 проценти, со што се намалува трговскиот дефицит, посочи Анѓушев.
Тој ги повика компаниите, членки на Конфиндустрија, да ги разгледаат мерките од Планот за економски раст и изрази надеж дека отворањето на канцеларијата ќе биде дополнителна можност за привлекување на инвестиции од Италија.
Претседателката на Сојузот на стопански комори (ССК) Данела Арсовска истакна дека Македонија и Италија се значајни трговски партнери и добри пријатели.
„ССК добро соработува со Конфиндустрија во Италија и во земјите од регионот и ме радува што ќе бидеме во можност да им пружиме логистичка, техничка и секој вид на друга поддршка во Македонија, рече Арсовска.
