Хакерска група под покровителство на кинеската држава се инфилтрирала во главните инфраструктурни мрежи во Соединетите Американски Држави, објавија вчера во Вашингтон, неговите западни сојузници и „Мајкрософт“, предупредувајќи дека слични „кампањи“ може да се случат низ целиот свет.
Властите задолжени за информатичката безбедност во САД, Канада, Велика Британија и Нов Зеланд, предупредија во заедничката изјава за „низа активности“ кои се поврзуваат со „кинескиот државен сајбер актер, познат и како Волт Тајфун (Volt Typhoon)“.
„Оваа активност влијае на мрежите на главните американски инфраструктурни сектори“ и субјектот што ги извршува нападите „може да ги примени истите методи (…) низ целиот свет“, додаваат тие.
„Мајкрософт“ во одвоено соопштение вели дека „Волт тајфун“ е активен од средината на 2021 година и дека, меѓу другото, таргетирал важна инфраструктура на островот Гуам, каде се наоѓа голема американска воена база во Тихиот Океан.
Таа „кампања“ може да ја „наруши критичната комуникациска инфраструктура меѓу САД и азискиот регион во идни кризи“, предупреди „Мајкрософт“.
„Забележаното однесување води до заклучок дека злонамерниот актер има намера да се занимава со шпионажа и да го задржи пристапот (до инфраструктурата) што е можно подолго без да биде забележан“, додаде американската технолошка групација.
