– Фасадата од предната страна на поранешниот Дом на АРМ, сега објект во сопственост на општината, од денес ја краси уметничкото дело насловено „Лузна“ на познатиот уметник Никола Пијанманов од Струмица.
Според него, делото претставува монументален ликовен обид за редефинирање на рацете од пештерите во кои пред 30.000 години едни прасликари насликале ѕид со дланки оптегнати во грч и страв, раце во агонија и паника од природните феномени, неизвесност од големата природа.
-Во едната дланка крвотокот се отсликува во форма на крошна од дрво.Таа рака го носи во себе печатот на прадрвото, сеќавањето на Еденската градина, но и стигмата на страдањето-жртвите и маченици на модерните болести. Во другата дланка која станува суво дрво се згрчени гранки-прсти е втиснат печатот на сушата. Разделбата со дрвото е распетието на современиот човек. Денеска нашите дланки се виткаат во
грч од изчезнувањето на таа природа. Дланката на современиот човек е сува од стихијата на апокалиптичните загадувања, пластики, пустошењето на дрвјата, небото и водите, рече уметникот Никола Пијанманов.
Сликата е дел од кампањата „Еко фронт” на општина Струмица за подигање на еколошката свест и соочување со предизвиците од загадувањето и уништувањето на животната средина.
Изработката на ова уметничко дело покрај општина Струмица финансиски ја поддржа и компанијата „Изолмак-Фибран“ од Струмица.
