„Никола Груевски и раководството на ВМРО-ДПМНЕ нема да го избегнат соочувањето со одговорноста за направените криминали и злодела со тоа што го одложуваат изборот на новата Влада. Тоа е мнозинската волја на граѓаните и таа ќе се преточи во институциите на системот.
Изборот на новата Влада значи крај за Сваровски судството, крај за судии избрани од тевтерчиња кои ги штитат криминалите на Никола Груевски раководството на ВМРО-ДПМНЕ и носат нарачани судски пресуди против политички неистомисленици, рече на денешната прес конференција Петре Шилегов од СДСМ.
Груевски и соработниците, истакна Шилегов, знаат дека промените носат и крај за балските интервенции кај државниот обвинител Марко Зврлевски, за кумовските врски како онаа на Трајко Вељановски и Јово Вангеловски, за кадровските пајажини во судството што ги прават Груевски и фамилијата и сега на заминување, како што се последните примери на смени во Кривичниот суд.
Според портпаролот и пратеник од СДСМ, новата реформска Влада, веднаш по изборот ќе предложела продолжување на рокот во којшто Специјалното јавно обвинителство може да покренува обвиненија, за расчистување на скандалот со прислушувањето и понатамошна борба против корупција, криминал, злоупотреби на власта и ќе ги донеле измените на Законот за заштита на сведоци кои ги побарало СЈО, за, како што посочи, да овозможеле квалитетни истраги и одговорност за сите криминали и злоупотреби.
„Новата Влада ќе обезбеди поширока поддршка и мнозинство за воведување на специјализирано одделение во судот, за постапување по предметите што се во надлежност на СЈО. Ќе има реформи на Судскиот совет, како и измени на Законот на судови заради воведување јасни критериуми за избор, напредување и разрешување на судиите. Квалитетот и ефикасноста на судиите ќе се мерат објективно, според бројот на решени предмети, бројот на обжалени пресуди, бројот на потврдени пресуди, причините за укинување на пресудите и времетраењето на судските постапки“, рече Шилегов.
Според Шилегов, ќе следувале и темелни реформи во Јавното обвинителство. Македонија, вели, ќе биде правна држава во која законите ќе важат подеднакво за сите, а криминалците ќе одговарале и ќе ги врателе сите украдени пари.
Секој кој е против овие промени треба да знае дека е заштитник и соучесник во криминалите на досегашната власт, или е злоупотребен за тие цели, децидни се од СДСМ.
„Ги повикуваме сите вработени во јавните установи и правосудниот систем да бидат свесни за нивната одговорност и историскиот момент во кој живееме. Секој мора да ја работи својата работа професионално, неселективно и според законите и да не се става во заштита на криминалот и криминалците. Укажуваме дека мнозинската волја на граѓаните ќе се испочитува, ќе се избере претседател на Собранието што ќе отвори пат за брз избор на новата реформска Влада на граѓаните и Македонија ќе биде правна држава“.
