Истрагата во малопродажбата и во трговијата на големо со храна во Шведска откри „загрижувачки“ знаци во заработката на трговците, објави регулаторот за заштита на конкуренцијата, додавајќи дека сè уште ја анализира врската со наводните високи трошоци.
Регулаторот утре ќе ги објави прелиминарните наоди од истрагата за цените на храната и конкуренцијата што во март ги побара шведското Министерство за финансии.
Загриженост заради маржите
„Забележуваме одредени причини за загриженост во развојот на маржите во трговијата на мало и на големо“, изјави за Ројтерс раководителот на Одделот за злоупотреба на пазарот во регулаторната агенција, Мартин Мандорф.
„Очекуваме дека развојот на маржите е поврзан со зголемување на трошоците, инаку би можеле да бидеме прилично загрижени“, истакна Мандорф, додавајќи веднаш дека е тешко да се изолираат трошовните фактори, како што се цената на енергијата и војната во Украина, од конкурентниот пејзаж.
Агенцијата го истражува целиот ланец на снабдување со храна, од производители и велетрговци до малопродажниот сектор, и собрала податоци од водечките супермаркети во Шведска за цените и маржите.
Се подготвува да побара и дополнителни информации, а дополнителните наоди ќе бидат објавени до крајот на годината.
Доминираат три големи компании
„Во шведскиот сектор за трговија со прехранбени намирници доминираат три големи компании, што е доказ за ‘олигопол’“, рече Мандорф.
Ланецот за трговија со храна ИЦА (ICA) имаше 53 отсто пазарен удел во 2022 година, според податоците од регулаторот, а остатокот речиси целосно го покриваат „Аксфуд“ (Axfood) и (Coop).
Германскиот „Лидл“ (Lidl) влезе на шведскиот пазар во 2018 година, а во 2022 година имаше само 5,7 отсто од пазарниот удел.
Донеодамна високите цени го зголемија притисокот на конкуренцијата, превземајќи дел од пазарот од водечките играчи.
Намалени цени после разговор со министерката
На почетокот на годината, министерката за финансии, Елизабет Свантесон, повика три големи ланци на супермаркети на разговор, барајќи од нив објаснување за високите цени.
После состанокот супермаркетите привремено ги намалија цените на некои производи.
„Аксфуд“ соопшти дека ја поздравува истрагата на агенцијата.
„Често и конструктивно разговараме со шведскиот регулатор за заштита на пазарната конкуренција и ги чекаме заклучоците од истрагата“, велат од компанијата.
ИЦА, пак, нагласи дека сопствениците на нејзините 13.000 продавници се независни трговци кои се натпреваруваат меѓу себе.
„Цените се дефинираат на ниво на продавница“, објаснуваат од компанијата и додаваат дека цените на секојдневните производи се намалени и дека се работи и за долгорочни намалувања.
