Турскиот парламент го даде долгоочекуваното одобрување за членството на Шведска во НАТО, со што оваа нордиска земја значително поблиску до приклучување кон западната воена алијанса по неколкумесечна неизвесност.
Три месеци откако Реџеп Таип Ердоган поднесе предлог-закон до парламентот за одобрување на членството, пратениците вчера доцна вечерта гласаа за негова ратификација.
Се очекува турскиот претседател да го потпише законот во наредните денови.
Одобрувањето на Турција ја остава Унгарија како единствена земја која сè уште не го ратификувала членството на Шведска.
Претходно во вторникот, унгарскиот премиер Виктор Орбан наговести напредок поканувајќи го шведскиот премиер, Улф Кристерсон, да ја посети државата за да разговораат за ова прашање.
„Верувам дека поинтензивен дијалог може да придонесе за јакнење на довербата меѓу нашите земји и институции и на тој начин да овозможи натамошно зајакнување на нашите политички и безбедносни аранжмани“, напиша Орбан во писмото.
Портпаролот на Кристерсон рече дека засега немаат никаков коментар за поканата, но шведскиот министер за надворешни работи, Тобијас Билстром, посочи дека владата ќе мора „да размисли што сигнализира писмото пред да одговори на него“.
Шведска поднесе барање за приклучување кон НАТО во мај 2022 година, во исто време со Финска, во историска промена во нејзината безбедносна политика поттикната од руската инвазија на Украина во февруари претходно истата година.
Турција и Унгарија одржуваат подобри односи со Русија од другите членки на организацијата.
Тие претходно го запреа процесот на пристап. Финска конечно се придружи минатата година, но Анкара изврши притисок врз Стокхолм да го заостри својот став кон членовите на Курдистанската работничка партија (ПКК) со седиште во Шведска, која САД и ЕУ, како и Турција, ја сметаат за терористичка група.
Шведска веќе потпиша спогодба со САД за целосен пристап до 17 свои воени бази и го започна процесот на интеграција во НАТО.
(Фото: Турски парламент – Адем Алтан/АФП)
