Поранешниот британски премиер Џон Мејџор ја критикуваше серијата на „Нетфликс“, „Круна“, чиј петти дел ќе почне да се прикажува на 9 ноември, нарекувајќи ја „куп глупости“.
Биографите на кралското семејство и коментаторите веќе остро ја критикуваат новата сезона, која излегува два месеци по смртта на кралицата Елизабета Втора.
На новите епизоди им се замерува дека содржат низа невистини и дека му штетат на угледот на тогашниот принц Чарлс, кој во меѓувреме стана крал.
Како што пишува британскиот печат, во петтата сезона ќе се зборува за Чарлс, кој, уште додека беше принц од Велс, прави заговор за соборување на кралицата.
Медиумите претпоставуваат дека тоа ќе вклучува разговори во кои Чарлс го притиска Џон Мејџор да ја принуди неговата мајка да абдицира.
Поранешниот конзервативен премиер, кој беше на власт од 1990 до 1997 година, објави соопштение во кое се наведува дека тоа е „чиста измислица“.
„Со принцот од Велс никогаш не сме разговарале за абдицирање на кралицата Елизабета Втора“.
Џон Мејџор вели дека „на ниту еден начин“ не соработувал со „Круната“.
„Никој не ми се обратил за да се проверат фактите во сценариото на серијата“, се наведува во соопштението.
Ако сцените се навистина онакви какви што ги опишуваат медиумите, „треба да се гледаат исклучиво како штетна и злонамерна измислица“. Тоа ќе биде „куп глупости кои ќе бидат пренесени заради драматизирање, што е целосна невистина“.
Продуцентите ги отфрлаат ваквите критики и истакнуваат дека серијата „секогаш ја најавувале како фикција базирана на историски настани“.
