Советот на јавни обвинители на денешната седница со мнозинство гласови позитивно се изјасни по предлогот на Владата за разрешување на јавниот обвинител на Македонија, Марко Зврлевски.
„Ние уште денеска ќе го доставиме мислењето до Владата заедно со краткото образложение како што налага законот“, изјави по денешната седница Петар Аневски, претседател на Советот.
Тој не сакаше да одговори кое е образложението на Советот за прифаќање на предлогот на Владата, но одговори дека штом постои предлог, тие мора да се изјаснат по него во рок од 15 дена и дека тоа веќе го направиле.
Аневски и овој пат не пропушти да го пофали Зврлевски за неговата успешна работа. Напомена дека, наводно, бил добар обвинител и додаде дека во обвинителствата има голем број обвинители и дека државниот јавен обвинител не може беспрекорно да ја следи работата на сите.
Додека трае постапката за избор на нов обвинител, вршител на должноста Републички обвинител ќе биде Џељал Бајрами, кој е прв заменик на Зврлевски.
Владата, предлогот и мислењето на Советот ќе го испрати до Собранието кое треба да закаже седница и со просто мнозинство, односно со 61 глас да го разреши Зврлевски.
