Супермаглата во американската сојузна држава Луизијана предизвика незапаметен верижен судир поради значително намалената видливост во тоа подрачје, извести полицијата. Како што пренесува АП, станува збор за комбинација од густа магла и супермагла од блиското мочуриште.
Во несреќата учествувале најмалку 158 возила, а се случила вчера наутро по локално време во близина на Њу Орлеанс.
Делот од државниот пат 55 над езерото Пончартрејн е затворен се додека во целост не заврши истрагата.

Потврдени се седум смртни случаи, а повеќе од 25 лица се пренесени во локалните болници со различен степен на повреди. Според извештајот на полицијата, можно е бројот на жртвите да се зголеми бидејќи се уште трае расчистувањето на местото на несреќата.
Видео снимките од апокалиптичните сцени после несреќата покажуваат долга колона од скршени и изгорени автомобили на меѓудржавнниот пат број 55. Возилата се згмечени, натрупани едно над друго. Многу луѓе стоеја покрај патот или на покривите на возилата и со неверување гледаа во катастрофата, додека други викаа за помош.
Кристофер Кол (41) бил меѓу возачите кои учествуваа во сударите.
„Ногата веќе ми беше на сопирачката, успорував… кога џип ‘форд’ удри во мојата приколка и ‘ме поведе на возење’“, изјави тој за „Њу Орлеанс“.
Тој успеал со нога да ја отвори совозачката врата за да избега, а потоа им помагал на другите, извлекувајќи едно лице од прозорецот на автомобилот.
И Кларенсија Патерсон Рид се нашла во бранот уништени автомобили додека со сопругот и внуката возела кон Манчак.
Рид за медиумите изјавила дека можела да види луѓе како и покажувале со раце за да застане, но кога го направила тоа, нејзиниот автомобил бил удрен одзади и од страна од две други возила.
„Се случна бум, бум….
Автомобилите се удираа најмалку 30 минути.“
Успеала да скокне од возилото, но нејзиниот сопруг останал заробена внатре и ги повредил ногата и колкот.

Државната полиција на Луизијана сподели снимки направени од воздух на својата Фејсбук страница на кои се гледаат купишта скршени возила на коловозот, кој минува преку мочуришта и отворени води помеѓу езерата Пончартрејн и Маурепас.
Во понеделникот утрината, во период од цели шест часа, видливоста била речиси нула.Причината за тоа е супермаглата, која се создава кога влажни грмушки, лисја или дрвја ќе се запалат и тој чад се меша со поладен воздух.
Овој феномен може да биде многу опасен, особено на автопатиштата, а во минатото веќе предизвикуваше бројни верижни судири – особено во јужните делови на САД, во близина на коритата на потоците или каналите за одводнување – како што се оние што вообичаено се среќаваат во мочуришните подрачја кај Њу Орлеанс.
Супермаглата е виновник за многу сообраќајни несреќи во таа област во изминатите децении.
Четири лица загинаа на патот помеѓу Тампе и Орландо во 2008 година, кога слабата видливост ги принуди спасувачите пеш да одат од автомобил до автомобил за да проверат дали има повредени.
Тогаш беа повредени 40 лица, а се преврте цистерна и изгореа шест камиони со приколки.
Во 2012 година, животот го загубија 10 лица кога чадот од блиските шумски пожари се помеша со магла во Гејнсвил, на Флорида, а уште три лица загинаа на пат во централна Флорида.
Според американското Министерство за транспорт, во тоа подрачје, заради магла, секоја година се судруваат по повеќе од 38.700 возила, загинуваат повеќе од 600 луѓе, а 16.300 се повредени.







