Автомобилската компанија Ауди планира до 2022 година да ги намали производствените трошоци за 10 милијарди евра за да го поддржи финансирањето на преминот на производство на електрични автомобили, после скандалот поради мамење на тестовите на емисиите за издувни гасови, тврдат извори запознаени со плановите на произведувачот на автомобили.
Ауди, главната движечка сила на Фолксваген кога се работи за добивка, планира во наредните години на пазарот да лансира пет нови електрични модели. Прво ќе биде спортското теренско возило „е-трон“, кое од 2018 година ќе се составува во погоните во Брисел.
Поголемиот дел од заштедата од 10 милијарди евра се однесува на намалување на трошоците за истражување и развој, се дознава од соговорниците.
Портпаролот на германскиот индустриски гигант од седиштето во Инголштад одби да ги коментира информациите за тоа. Имено, весникот за бизнис и економија „Ханделсбат“ во неделното издание ги објави плановите за намалување на трошоците и плановите за профитабилноста на таа автомобилска компанија.
Ауди сака да ослободи средства и за вложување во технологијата за нулта емисија, развивајќи нова производствена платформа со Порше. Со поделбата на компонентите и модулите двата луксузни бренда на „Фолксваген“ би заштедиле пари.
Компанијата се бори со потешкотиите после повлекувањето на автомобили од пазарот, истрагите и постојаните критики на синдикатите и менаџерите после скандалот во врска со емисиите на јаглерод диоксид кај дизел возилата и своите стратегии после тој скандал.
