На Азиските берзи цените на акциите пораснаа бидејќи се очекува забрзување на растот на кинеската економија, но на пазарите нема еуфорија бидејќи централните банки поради високата инфлација ќе продолжат да ги зголемуваат каматните стапки.
Индексот МЦСИ на азиско-пацифичкиот регион, без Јапонија, околу 7 часот беше во плус за 0,7 отсто.
Притоа, јапонскиот индекс Никкеи зајакна за 1,1 отсто, додека цените на акциите во Хонг Конг, Австралија и Јужна Кореја пораснаа меѓу 0,1 и 0,9 отсто. Во Шангај, пак, тие паднаа за околу 0,2 отсто.
Растот на индексот главно се должи на забрзувањето на растот на кинеската економија, после укинувањето на рестриктивните мерки за корона вирусот, на што укажуваат сите најнови макроекономски податоци.
Зголемена е оценката за растот на кинеската економија
Кинеските власти објавија дека се стремат кон 5 отсто економски раст годинава. Заради тоа, многу аналитичари ги зголемија своите проценки. Така, на пример, аналитичарите на швајцарската УБС банка ја зголемија проценката за раст на кинеската економија од 4,9 на 5,4 отсто.
Но, кочница за берзите претставуваат најавите на централните банки за натамошно зголемување на каматните стапки.
Сите последни податоци покажуваат дека инфлацијата во САД и понатаму се држи на високи нивоа, што значи дека американската централна банка ќе мора да продолжи да ги зголемува каматите.
Така, на пазарот на пари, проценките за каматите на ФЕД се зголемени, па сега се очекува дека до септември тие ќе се подигнат во опсег од 5,50 до 5,75 отсто, додека сега каматите се движат меѓу 4,50 и 4,75 отсто.
Заради тоа, оваа недела во фокусот на инвеститорите ќе биде извештајот на претседателот на ФЕД, Џероми Пауел, до Конгресот, за состојбата на економијата, како и податоците за вработувањата во САД во февруари.
Се очекува и зголемување на каматните стапки на Европската централна банка. Претседателката на таа банка, Кристин Лагард, за време на викендот изјави дека ЕЦБ многу веројатно во овој месец ќе ги зголеми каматите за дополнителни 0,50 процентни поени и дека банката ќе мора да продолжи да работи на сузбивање на инфлацијата.
Оваа недела, пак, се очекува австралиската централна банка повторно да ги зголеми каматите, сега за 0,25 процентни поени, додека Централна банка на Канада најверојатно ќе ги остави каматите непроменети.
Доларот ослабе, цената на нафтата падна
А, на валутните пазари падна вредноста на доларот во однос на кошничката на валути, по минатонеделниот раст од 0,6 отсто.
Индексот на доларот, кој ја покажува вредноста на американскиот пара во однос на другите шест најважни светски валути, се движи околу 104,45 поени, додека во петокот вечерта изнесуваше 104,60 поени.
Притоа, курсот на доларот во однос на јапонската валута се лизна од 135,85 на 135,60 јени.
Доларот ослабе и во однос на европската, па цената на еврото достигна 1,0645 долари, додека во петокот вечерта беше 1,0635 долари. Цените на нафтата паднаа откако минатата недела пораснаа за повеќе од 3 отсто. Барелот на лондонскиот пазар утрово се лизна за 0,64 отсто, и сега чии 85,28 долари, додека на американскиот пазар барелот поефтини за 0,65 отсто, на 79,15 долари.
