Референдумот на граѓаните на Богданци, „за“ или „против“ рудници во општината е успешен. На 12 избирачки места излегоа над 50 отсто од запишаните 6.918 граѓани со право на глас.
Граѓаните сметаат дека треба да се слушне гласот на народот за проекти кои ќе имат влијание врз животната средина.
Населението денеска се изјаснуваше за две референдумски прашања, дали да се стопира изградбата на рудникот „Казандол“ во Валандово и дали се за или против отварање на рудници и рударски комплекси за метали и минерали во нивната општина.
Набљудувачите на граѓанската организација „ЦИВИЛ“ од терен открија помали и, како што наведоа, очекувани проблеми, а биле нотирани и притисоци.
„Во последните 24 часа повеќемина богданчани добиле телефонски повици од активисти на ВМРО-ДПМНЕ да не излезат на денешното референдумско изјаснување, или да се изјаснат во полза на отворање рудници, односно на продолжување на работата на рудникот во Казандол“, посочија од „ЦИВИЛ“.
Од таму додадоа дека иако иницијативата „Спас за Богданци“ е поддржана од Советот на Општината, односно, од сите партии, како и од организациите на граѓанското општество, сепак, притисоците против успехот на референдумот се евидентни, со што станува очигледно дека партиските структури на локално и на централно ниво имаат различни позиции по ова прашање.
Над 10 граѓанки и граѓани не можеа да го остварат своето право, затоа што ги немаше на Избирачкиот список. На едно избирачко место се нотира дека УВ-ламбата не работела.
Набљудувачите на ЦИВИЛ известуваат и за недоволна обученост на дел од членовите на избирачките одбори.
Богданци е втората општина каде се спроведува рефендум, откако и жителите на Гевгелија кажаа не за отварање рударски комплекс на планината Кожуф.
За стопирање на рудникот „Казандол“ идната недела ќе гласаат и жителите на Дојран, додека Валандовчани ги доставија потребните потписи општинските власти да распишат референдумско изјаснување.
