Политичката криза во Боливија ескалираше затоа што силите за безбедност отворија оган на приврзаниците на Ево Моралес при што се убиени најмалку осум, а повредени се десетина лица, што ги загрозува напорите на привремената влада да ја обнови стабилноста после оставката на поранешниот претседател.
„Повеќето загинати и повредени во градот Сакаби во петокот се здобија со рани од куршуми“, рече директорот на болницата во тој град.
Според неговата оценка, ова е најлошото насилство кое го видел во својата триесетгодишна кариера.
Демонстрантите и роднините на жртвите се собраа на местото на убиствата, извикувајќи: „Граѓанска војна, веднаш!“, пренесува агенцијата АП.
Ево Моралес, кому во Мексико му е одобрен азил после оставката на местото претседател на Боливија, напиша на Твитер дека се случил масакр, додека привремената влада која ја предводи Џанин Ањес ја нарече диктатура.
„Сега ги убиваат нашите браќа во Сакаби“, напиша Моралес во друг твит.
Демонстрантите велат дека полицијата стрелала кога насобраните граѓани се обиделе да го пробијат воениот контролен пункт.
Најмалку 13 лица загинаа во текот на претходните повеќенеделни демонстрации против Моралес, пред тој да замине во Мексико.
Обединетите нации предупредија денеска дека насилството во Боливија можело да се „отргне од контрола“, откако изминатата ноќ во судирите меѓу силите за безбедност и приврзаниците на Моралес загинаа осум лица.
Високиот комесар на ОН за човекови права Мишел Башеле истакна дека ескалацијата на насилствата може да го загрози демократскиот процес во таа земја.
„Се плашам дека состојбата во Боливија може да излезе од контрола ако властите кон неа не се однесуваат со полно почитување на човековите права“, наведе таа во соопштението.
Таа, меѓу другото, додаде и тоа дека репресивните акции на власта можат да ја загрозат секоја можност за дијалог.
