Две еко-активистки денеска фрлија супа од домати врз, со стакло заштитена, сликата на Мона Лиза во Лувр во Париз, и побараа право на „здрава и одржлива храна“.
Откако во најновиот гневен „климатски напад“ го измачкаа непробојното стакло што ја штити познатата слика на Леонардо да Винчи, демонстратките застанаа пред неа и ги открија маиците на кои со црни големи букви го пишуваше името на еко групата на која тие припаѓаат („Riposte Alimentaire“), притоа викајќи дека нивниот земјоделски систем е болен.
„Riposte Alimentaire“, која е дел од таканареченото движење „Мрежа А-22“, збир на протестни групи во 12 земји низ целиот свет, која ја вклучува „Just Stop Oil“ од Велика Британија, ја презеде одговорноста за нападот, кој се случи околу 10 часот, и ги идентификуваше активистите како Саша (24) и Мари-Жулиет (63).
Најголемата просторија во музејот каде што е изложено ремек-делото беше евакуирана и затворена на еден час додека се се исчисти и повторно беше доведено во ред.
Сликата на Леонардо да Винчи од 16 век, една од највредните слики во светот која се чува во парискиот музеј Лувр, го држи Гинисовиот рекорд за највисоко осигурување од 100 милиони долари во 1962 година – околу 1 милијарда долари денес. Се наоѓа зад непробојно стакло, што значи дека е малку веројатно дека е оштетена.
„Што е поважно? Уметност или право на здрава и одржлива храна!? Вашиот земјоделски систем е болен. Нашите земјоделци умираат на работа!“, стоејќи пред сликата викаа Саша и Мари-Жулиет пред посетителите во музејот.
„Веднаш интервенираше персоналот за обезбедување на Лувр. Просторијата ‘Salle des Etats’, каде што е изложена Мона Лиза, беше мирно евакуирана. Пристапот на посетителите до сликата беше суспендиран на еден час, додека беше извршено неопходното чистење. Собата беше повторно отворена за посетители во 11.30 часот. Музејот ќе поднесе жалба“, се вели во соопштението на Лувр.
Акцијата доаѓа во време кога француските фармери протестираат со денови за подобри плати, даноци и регулативи.
Премиерот, Габриел Атал, во петокот најави неколку мерки, но блокадите на патиштата продолжија во различни делови на земјата.
Денешната акција на климатските активисти против светски познатите слики е за да побараат поголема акција за постепено исфрлање на фосилните горива и заштита на планетата.
Од Еко групата велат дека тие бараат „воспоставување на одржливо социјално осигурување на храната“.
Во француската престолнина изминативе денови протестираа земјоделците, кои повикуваа на запирање на се поголемите цени на горивата и на поедноставување на прописите и во петокот ги блокираа клучните патишта до и од Париз.
Ова не е прв ваков случај, а вниманието на јавноста го привлече и оној од 2022 година кога маж преправен во старица во инвалидска количка фрли торта врз Мона Лиза.
Бројни активисти, со вакви акти на вандализам се обидуваат да го свртат вниманието кон зачувувањето на природата и планетата.
Засега нема нови детали за овој инцидент.
