Претседателот на Украина, Володимир Зеленски, би требало вечерва да допатува во Албанија, каде што утре ќе се одржи самитот Украина-Југоисточна Европа, а Тирана од денеска е под силни безбедносни мерки, пишуваат албанските медиуми.
Како што јавува „Воксњуз“, во реализација на безбедносните мерки ќе бидат ангажирани околу 1.600 полицајци, вклучувајќи интервентни тимови и антитерористичка служба, додека уште 400 припадници на гардата ќе бидат во состојба на готовност, а антиексплозивни групи ќе ја надгледуваат ситуацијата.
Се очекува Зеленски да има повеќе билатерални средби во Тирана, меѓу кои и со албанскиот премиер, Еди Рама, и со претседателот, Бајрам Бегај.
По самитот на Украина и Југоисточна Европа, на кој ќе учествуваат и претставници на балканската шесторка, во четврток ќе се одржи самитот на Западен Балкан на кој ќе се разговара за Планот за раст на тој регион.
Се очекува и доаѓање на претседателката на Европската комисија, Урсула фон дер Лајен.
