Метеоролошката канцеларија на Велика Британија и Агенцијата за здравствена безбедност издадоа денеска предупредување поради екстремно студеното време во наредните денови.
Синоптичарите истакнаа жолто предупредување, трет степен на метеоролошка тревога.
Во превод, тоа значи дека цела недела ќе биде екстремно студено, особено на север, со зголемен ризик од снег, голомразица и ноќен мраз, и следствено на тоа проблеми во сообраќајот, пишува Скај њус.
Температурите во текот на денот само понекаде ќе се искачат над 0°С.
На југот на Англија ќе биде облачно со повремени врнежи од дожд, а на планините се очекува снег, додека на северот и на истокот од земјата ќе има снежни врнежи.
Во попладневните часови се очекува да престанат врнежите на југот на Англија, но до вечерта може да има дожд на југозапад.
Утре ќе биде претежно суво, но студено. Во јужна Англија, јужен Велс и јужна Ирска се очекува да биде ветровито со дожд и снег и да има снежна виулица.
Во четврток и петок има зголемени шанси за снег во централна и северна Англија.
Секој работен ден, Британците може да очекуваат снег.
Вечерва, како што прогнозираат британските метеоролози, се очекува најстудената ноќ во годината, со температури кои ќе се спуштат до -15 Целзиусови степени.
Граѓаните, алармираат метеоролозите, треба да бидат подготвени за многу ниски температури и во наредните денови.
Агенцијата за здравствена безбедност на Обединетото Кралство издаде предупредувања за снег и мраз за поголемиот дел од Англија, Шкотска, Велс и Северна Ирска.
Причина за заладувањето што во март стигна во Велика Британија е комбинацијата на млазната струја и областа со низок притисок над централниот Атлантик.
Портпаролот на британскиот метереолошки завод, Греам Меџ, рече дека температурите ќе бидат „многу, многу пониски отколку што би очекувале во овој период од годината“.
„Очекуваме ваквото време да се задржи барем до следниот викенд, а можеби и подолго, бидејќи понекогаш ваквите временски прилики знаат да бидат прилично ‘тврдоглави’ и не попуштаат така лесно“, објасни тој.
Многу снег веќе падна во делови од Абердиншир, во Шкотска, а локалните медиуми јавуваат дека автомобили и автобуси се заглавени на замрзнатите патишта поради опасните услови.
Некои граѓани мораа да ги остават своите автомобили на инаку прометни патишта, а „Фјубар њус“ ја опишува глетката како „несреќа што чека да се случи“.
Медиуми јавуваат и за бројни застои на патиштата на кои се заглавени и автобуси и автомобили, „бидејќи не можеле да продолжат поради замрзнатите и непроодни патишта“.
Поради ниските температури, четири од пет електрани на јаглен во Британија ќе бидат во состојба на готовност во случај на зголемена потрошувачка.
