Вистината за политички притворените уметници се пробива надвор од границите на Република Македонија. Нивни колеги сè повеќе се запознаваат и реагираат на фактот дека Македонија не е демократска држава, туку држава во која политички за терористи се прогласуваат истакнати уметници и интелектуалци, а потоа системот без никакви докази ги фрла во притвор, велат од ВМРО-ДПМНЕ.
„Десетици невино гонети патриоти лежат во притвор, а Зоран Заев и пријателите трошат по 100.000 евра на приватни забави во соседството. Десетици македонски патриоти неосновано се во ќелиите во Шуто Оризари, а претставници на власта лицитираат со имиња на аеродроми, улици, патишта, па дури и со името на државата на приватни забави“, велат од партијата.
Од таму додаваат дека притворот, наместо како мерка за претпазливост, се користи како казна и средство за изживување. Според ВМРО-ДПМНЕ, органите на прогонот се користат за монтирање судски случаи и пресметка со сопствените граѓани што мислат поинаку.
„Притворените се соочени со кршење на нивните права во сите фази од процесот. Незаконитоста во постапките е нотирана и од народниот правобранител. За жал, судот и ОЈО остануваат неми и се однесуваат како соизвршители во ова незаконие.
Правниците во судовите и ОЈО не треба да дозволат да бидат обележани во учебниците по право како пример како не треба да постапува еден судија или обвинител. Законската постапка е право на граѓаните, а правичноста и законитоста обврска на судијата“, велат од ВМРО-ДПМНЕ.