Четири лица, меѓу кои две деца, се водат за исчезнати во саботата по рекордните поплави предизвикани од обилните врнежи во покраината Нова Шкотска, во источна Канада, соопшти полицијата.
„Две деца имало во автомобил кој е потопен, а тројцата возрасни кои биле со нив успеале да побегнат“, изјавила портпаролката на Канадската кралска жандармерија. Потрагата по нив сеуште трае.
„Две други лица исчезнаа во слични околности“, додаде портпаролката.
Двајца патници од тоа возило биле спасени.
Нова Шкотска на крајот на мај ја зафатија шумски пожари што опустошија неколку канадски покраини.
Премиерот на Канада, Тим Хјустон, на прес-конференција истакна дека за помалку од 24 часа во покраината наврнале околу 250 мм дожд, што одговара на количината која просечно паѓа за три месеци.
Хјустон прогласи вонредна состојба во некои делови на покраината, оценувајќи дека ќе бидат потребни неколку дена за да се повлече водата.
Силниот дожд што паѓа од петокот во таа област го наруши сообраќајот, поплави куќи и се заканува да ја пукне браната.
Жителите од областа Виндзор, шеесетина километри северозападно од Халифакс, главниот град на покраината, добија среде ноќ наредба да се евакуираат, поради опасност од попуштање на браната.
Но, во саботата попладне, надлежните ги отворија вентилите за да се намали притисокот. Ситуацијата е „под контрола“, информираше градоначалникот на Виндзор Абрахам Зебијан, а наредбата за евакуација е укината.
На телевизиските снимки и на социјалните мрежи можеше да се видат патишта под вода, напуштени автомобили и улици кои се претворија во вистински реки.
Канадската метеоролошка служба најави продолжување на врнежите до утре на истокот на покраината, вклучително и на островот Кап Бретон.
На жителите на покраината им беше упатен повик да останат дома бидејќи многу патишта се непроодни. Околу 70.000 домаќинства утринава беа без струја, а попладнево околу 6.000 потрошувачи се „во темница“.
(Фото: „Профимедиа“)
