Фудбалерите на Олимпијакос во финалето на Конференциската лига, после продолженија, ја совладаа Фиорентина од Фиренца со 1:0. Натпреварот беше решен во 116. минута со голот на мароканскиот напаѓач Ајуб Ел Кааби.
Финалето се играше во Атина, но не на стадионот на Олимпијакос, туку на теренот на градскиот ривал Аек.
Во 120-те минути игра немаше многу шанси за погодоци, поради фактот дека и двете екипи повеќе се фокусираа на одбраната отколку на нападот.
Двата тима беа доста активни на почетокот на натпреварот, но подоцна фудбалот се претвори во тактичка игра во која никој не сакаше да ризикува. И во вториот дел гледавме слична игра. Таа не се промени ниту во продолженијата.
Кога се чинеше дека победникот ќе го одлучат ударите од белата точка, Грците постигнаа гол.
Сантијаго Хеце од левата страна ја нафрли топката пред голот на Фиорентина, а Ел Кааби со глава ја затресе мрежата. Италијанците сигнализираа дека погодокот бил постигнат од недозволена офсајд позиција по што главниот судија на натпреварот побара помош од „ВАР собата“. Но, прегледот покажа дека голот е регуларен.
Олимпијакос со победа го освои првиот европски трофеј, додека Фиорентина вторпат по ред го загуби финалето во ова натпреварување. Минатата година беше поразена од лондонски Вест Хем, исто како и сега, во последните моменти од натпреварот.
