Холандската влада апелираше до граѓаните да ги спречат децата и домашните миленици да голтаат пена на морскиот брег, откако студијата покажа дека во неа се концентрирани т.н.„вечни хемикалии“.
Имено, истражувањето на пената на белгиското приморје покажало концентрација на перфлуорирани и полифлуорирани алкилирани супстанции кои сочинуваат повеќе од 4.700 хемикалии (ПФАС), кои се широко користени заради нивните водоотпорни својства, но тешко се уништуваат.
Потоа, холандскиот Институт за јавно здравје во април и август изврши слични мерења на брегот во северна и јужна Холандија.
Се покажа дека морската пена во популарните одморалишта, вклучувајќи ги Егмонд, Катвијк, Шевенинген, Тексел и Зандворт, има забележително ниво на спорната супстанција. Истата, за среќа, не е „многу висока“ како она што го откри Фламанскиот институт за технолошки истражувања во примерок од белгиското одморалиште Кноке.
Синтетичките хемикалии се поврзуваат со токсични ефекти врз човечкиот имунолошки систем, одредени видови на рак, проблеми со плодноста и ризици за дивите животни.
„Задолжително треба да се туширате после капење, да ги миете рацете пред јадење и да не им дозволувате на децата и домашните миленици да ја голтаат морската пена.
Институтот за јавно здравје претходно утврди дека Холанѓаните се веќе премногу изложени на таа врста хемикалии. Голема количина од неа доаѓа од храна и вода за пиење“, изјави министерот за водостопанство, Марк Харберс.
Истакна и дека не се потребни дополнителни мерки во поглед на капењето во морето бидејќи нивото на ПФАС во водата е „многу помало“.
РИВМ, исто така, соопшти дека поради недостигот на сите податоци, сè уште не е јасно што значи присуството на хемикалиите во пената „за здравјето на капачите, сурферите или луѓето што шетаат на плажа“.
ПФАС, инаку, се користи во сè, од водоотпорна облека и козметика до пена за гасење пожар и кутии за пици.
Некои од неговите супстанции се забранети, но постои загриженост за нивото на истите во животната средина затоа што врските на јаглеродот и флуорот, кои хемикалиите ги прави толку корисни, се спротивставуваат на распаѓањето, поради што и ги нарекуваат вечни хемикалии. И Европската унија размислува за воведување големи ограничувања кога станува збор за ПФАС.
(Фото: Пиксабеј)
