Берзанските индекси на Волстрит вчера силно пораснаа, благодарение на стабилизацијата на британскиот финансиски пазар и подобрите отколку што се очекуваше квартални деловни резултати на неколку банки и компании.
Инвеститорите најмногу ги охрабрија деловни резултати на Американската банка (Bank of America).
Цената на таа акција скокна за повеќе од 6 отсто, што ги повлече акциите на другите банки, па СиП (S&P) индексот на тој сектор скокна за 3,5 отсто.
„На кревкиот пазар, секоја и малку подобра вест може да има многу позитивен ефект на него. Повисоките каматни стапки се добри за банките, така што нивните деловни резултати би можеле да бидат помалку лоши отколку што стравуваа инвеститорите“, вели Емили Роланд, стратег во „Џон Хенкок Инвестмент Менаџмент“.
Поради високата инфлација, зголемувањето на каматите и забавувањето на економскиот раст, очекувањата за деловните резултати на компаниите се значително намалени во последните месеци.
Така, аналитичарите во истражувањето на Ројтерс проценуваат дека заработката на компаниите од индексот СиП 500 се зголемила за 3 отсто во третиот квартал во однос на истиот период минатата година.
На почетокот на јули очекуваа зголемување на заработките за 11 отсто, а на почетокот на октомври 4,5 отсто.
Позитивно на пазарот имаше и стабилизацијата на британскиот пазар на обврзници, откако тамошната централна банка во петокот ги заврши интервенциите насочени кон стабилизирање на тој пазар.
