Иако останаа уште само неколку часа до истекот на примирјето, сирените за опасност од ракетен напад се огласија во израелските заедници во близина на границата со Газа.
Ова е прв пат да се слушнат сирените за тревога од почетокот на прекинот на огнот на 24 ноември, јавуваат израелските медиуми.
Од Хамас немаше коментар.
Израелската армија соопшти дека продолжува со борбата против Хамас во Газа. ИДФ потврди дека нејзиниот одбранбен систем „Железна купола“ пресретнал ракета истрелана од Газа, денеска рано утрово.
Портпаролот Даниел Хагари информираше дека нивните воени авиони напаѓаат „терористички цели на Хамас“.
„Хамас ја прекрши оперативната пауза, а освен тоа, пукаше кон израелска територија“, рече Хагари.
Министерството за здравство на Газа соопшти дека 14 Палестинци се убиени во израелските воздушни напади по истекот на прекинот на огнот утринава.
Ројтерс ја пренесува оваа бројка, додека репортерот на Ал Џезира, Хинд Кудари, претходно изјави дека најмалку шест се убиени во нападот на куќа во Рафах, а уште седум биле убиени во областа Магази.
Израел бара од жителите во одредени населби на Кхан Јунис да заминат пред очекуваниот напад во областа.
„Израелските сили фрлаат летоци за луѓето во Кан Јунис барајќи од нив да се евакуираат во Рафах, но тие исто така го гаѓаат Рафах“, рече Кудари.
Катарските и египетските посредници се во контакт со Хамас и Израел и по обновувањето на борбите во Газа, според извор запознаен со разговорите.
„Преговорите продолжуваат и покрај нападите“, истакнал тој, пренесуваат медиумите.
Двете земји беа клучни за преговорите кои вклучуваа прекин на огнот и размена на палестински затвореници за израелски заложници.
Катар и Египет се залагаа за уште едно дводневно продолжување на прекинот на огнот. Сè уште нема конкретни информации од посредниците зошто не е постигнат договор за дополнителен договор.
Палестинската Црвена полумесечина објави дека 310 камиони со хуманитарна помош успешно стигнале до северниот дел на окупираниот Појас Газа, кој Израел силно го бомбардираше.
Хуманитарната организација објави на мрежата X, (поранешна Твитер), дека виталните залихи како храна, храна за бебиња и ќебиња биле доставени до илјадници луѓе на кои им е потребна.
До почетокот на примирјето пред точно една недела, Израел својата воена акција ја насочуваше против исламистичката организација Хамас во северниот дел на Газа.
На стотици илјади луѓе им беше наредено да побегнат во јужниот дел на Газа.
Сепак, илјадници цивили загинаа во масовните бомбардирања.
Од почетокот на примирјето, кое во меѓувреме беше продолжено до денеска утрово, во крајбрежното подрачје преку Рафах, единствениот граничен премин отворен за помош, стигнале 1.132 камиони со храна, лекови и други потребни работи за населението.
Израелската затворска служба соопшти раноутрово дека ослободила 30 Палестинци од израелските затвори како дел од седмата размена на заложници според договорот за прекин на огнот со лидерите на Хамас.
Во соопштението се наведува дека Палестинците се ослободени од затворите во Израел, на окупираниот Западен Брег и во Ерусалим.
Палестинците ослободени од израелските затвори се 23 малолетници и седум жени, додека осумте израелски државјани се двајца малолетници и шест жени, вклучително и двојни меѓу кои се и двојни државјани на Мексико, Русија и Уругвај.
Две израелски државјанки вчера попладнето биле предадени на Црвениот крст во градот Газа, додека касно вечерта беа ослободени другите заложници.
Израелската војска вчеравечер потврди дека шест израелски заложници се ослободени во Појасот Газа и дека се „на пат кон Израел“, како дел од договорот со Хамас.
(Фото: Џон Мекдугал/АФП)
