Локални избори во Косово, трети по ред, ќе се одржат во недела и, според проценките на аналитичарите ќе претставуваат прв тест за владата на Рамуш Харадинај.
На изборите ќе се избираат претседатели на општини и одборници во општинските собранија.
Централната изборна комисија на Косово соопшти дека на изборите ќе учествуваат 91 политички субјект – 35 политички партии, една коалиција, 30 граѓански иницијативи и 25 независни кандидати.
На избирачкиот список запишани се вкупно 1.890.952 избирачи, а ќе се гласа во 38 општини.
Косовските Срби на изборите ќе излезат со 18 листи и ќе настапат во 21 општина – во 10 оптшини во кои сочинуваат мнозинство од населението и во 11 општини во кои не се мнозинство.
Изборната кампања официјално почна на 21 септември и трае до 20 на полноќ, кога во Косово почнува изборниот молк.
Белград го поддржува кандидатите од Српската листа, која после јунските вонредни парламентарни избори повторно учествува во политичките процеси и во владата во Приштина.
Претседателот на Србија Александар Вучиќ предупреди претходно дека одделни западни амбасади вршат голем притисок со цел да ја „растурат“ Српската листа и да го намалат нејзиното влијание во приштина и влијанието на Србија на Косово.
„Тие не сакаат Србите да имаат ’златна акција’ во владата во Приштина и настојуваат таа позиција да им ја отжнат и оневозможат на локалните избори, и во локалните средини“, оцени Вучиќ.
Во кампањата за локалните избори вклучен е и Хашим Тачи, косовскиот претседател и неформален лидер на Демократската партија на Косово, која е на власт со партијата Алијанса за иднина на косово, чиј претседател е Харадинај, и со Алијансата за подобро Косово на чие чело е еден од најбогатите луѓе на Косово, Беџет Пацоли.
Тачи поради тоа трпи критики, а уште на товар му се става и непотизам, заплашување, изнуда, криминал, нетранспарентност и корупција. На Харадинај, пак, му се замерува тоа дека владата ја формирал со Српската листа. Се смета, имено, дека тој на таков начин овозможил уште поголемо влијание на Белград на Приштина.
Се очекува албанските партии, освен за Приштина, да се борат за превласт и во Призрен, Гњилане, Митровица и Ѓаковица.
