Во среда на 20 декември во Солун продолжува судењето за Горан Грујевски и Никола Бошковски, откако вчера беше прекинато поради истекот на временскиот период предвиден за конкретното рочиште.
За екстрадиции во Грција, одлучува совет, најчесто во тричлен состав, двајца судии и еден обвинител, на јавно рочиште, освен ако не биде доставено специјално барање, сослушувањето да се одржи зад затворени врати. Токму таков беше случајот со поранешните началници во Управата за безбедност и контраразузнавање. Едниот од адвокатите побара судењето да биде затворено за јавноста, поради заштита на лицата за кои се бара екстрадиција.
„Нивната заштита е поважна од публицитетот, рекол, според грчката новинска агенција АНА-МПА, адвокатот Костас Хаѕијоану обраќајќи се до советот и побарал рочиштето да се одржи зад затворени врати. Ова негово барање според АНА-МПА го поткрепил со тврдењето дека Грујевски и Бошковски во Македонија се изложени на ризик од закани и прогон.
„Судиите се согласија со предлогот на обвинителот, кој претходно во неговото обраќање сугерираше да биде прифатено барањето „штом тоа го бараат самите лица по кои е распишана потерница“, и покрај тоа што, како што рече, рочиштето е јавно, пишува грчката новинска агенција, објаснувајќи зошто вчерашното судење беше затворено за јавноста.
Откако на 29 ноември беше одложено првото рочиште за екстрадицијата, по испратеното барање и документацијата од македонска страна, вчера во улога на прв сведок, советот на судии го сослуша исказот на адвокатот на обвинетите, Петар Василев. Според АНА-МПА, тој рекол дека ако се одобри екстрадиција, животите на Грујевски и Бошковски бу биле доведени во опасност, дека нема да имаат праведно судење, и оти не извршиле ниедно дело за кое што се товарат во Македонија.
Рочиштето беше прекинато откако помина предвиденото време за конкретниот случај и ќе продолжи во среда.
Освен за екстрадицијата, Грујевски и Бошковски имаат уште два други процеса во Грција, независни еден од друг. Едниот е за фалсификуваните пасоши со кои беа фатени на солунскиот аеродром. Судењето по три одложувања ќе се одржи на 17 мај следната година. Другиот случај е по поднесеното барање за азил на 29 ноември.
Грујевски и Бошковски во меѓувреме остануваат во притвор во близина на Солун.
Грујевски и Бошковски, кои се обвинети од СЈО за предметот „Тврдина и Таргет“, беа уапсени од грчката полиција на аеродромот во Солун на 18 октомври, при обид со лажни бугарски пасоши да заминат со авион за Будимпешта.
