Француската полиција денеска соопшти дека уапсила брачен пар кој во Париз, во ноќта меѓу вторникот и средата, исцртувал Давидови ѕвезди на куќи кои се во сопственост на Евреи.Јавноста беше прилично изненадена кога беше објавено дека брачната двојка доаѓа од – Молдавија.
Неименуваниот пар, 33-годишен маж и 29-годишна жена, Молдавци, биле уапсени откако сведоци ги виделе како го цртаат симболот на јудаизмот на ѕидовите на 15 згради каде живеат Евреи или каде што се наоѓаат еврејски организации.
Двојката е во притвор, а француските власти треба да одлучат дали ќе ги депортираат.
Во околината на Париз изминативе денови се појавија бројни графити Давидови ѕвезди, по антисемитските инциденти за кои француските политички лидери велат дека „ги потсетуваат на 30-тите години од минатиот век“.
Околу 60 Давидови ѕвезди биле исцртани во понеделникот навечер на ѕидовите на куќите во 14-тиот париски округ, објави Би-Би-Си, и додаде дека Франција се бори со нагло зголемување на антисемитските инциденти.
Повеќе од 850 такви инциденти се пријавени во Франција од нападите на Хамас на Израел на 7 октомври, информираше министерот за внатрешни работи, Жералд Дарманин.
„Плачам, затоа што повторно ја гледам омразата на која бевме изложени кога бев дете“, изјави жител на една од зградите кои беа „обележани“ со Давидовите ѕвезди за ТВ „БМФ“. Патем рече дека не може да го разбере сето тоа.
(Фото: АФП – Ана Маркуеритат)
