Во Италија е основано училиште за овчари, а во април почнува првиот курс за сите оние кои сакаат да живеат нов живот во идиличните Апенински планини.
За курсот пристигнаа стотици апликации бидејќи младите се решени да се вратат на традиционалните занимања кои беа напуштени во последните децении.
„Добивме многу барања од оние кои сакаат да започнат нов живот. Би биле среќни ако нашите студенти овде или на друго место во иднина сакаат да започнат сопствено сточарство“, изјави за весникот „Ла Стампа“, Лука Сантини, раководител на Националниот парк „Казентинези“, место кое е централен дел од програмата.
Националниот парк се простира на повеќе од 360 квадратни километри на Апенините, меѓу провинциите Арецо и Форли.
Оние што ќе тргнат на школо, кое првично ќе биде отворено за само шест лица, се избираат врз основа на претходно искуство и мотивација.
Курсот опфаќа теоретски дел и практичен дел кој вклучува едномесечен престој со стадо овци во шумите на Апенините, обука за стрижење овци, одгледување и заштита од диви животни.
Училиштето за овчари е бесплатно. На учесниците ќе им биде понудено бесплатно сместување во националниот парк и објектите што се на тоа подрачје, на фарми кои учествуваат во проектот.
Во училиштето посебно внимание ќе се посвети на актуелните предизвици со кои се соочуваат планинските заедници, како што се ублажување на штетните ефекти од климатските промени или подобрување на екосистемите и биолошката разновидност.
„За паркот е важно да се одржи рамнотежата меѓу шумите и пасиштата и да се зачува биолошката разновидност на инсектите и водоземците. Истото го правиме и кога станува збор за волците. На овчарите им даваме кучиња кои се тренирани да ги избркаат, а да не ги нападнат“, вели Сантини.
До 2027 година се планира да се организираат четири вакви курсеви.
Школото за овчари е финансирана од Европската Унија. Проектот (наречен „LIFE SheepForBio“) има за цел да ги подобри и зачува живеалиштата на Апенините преку оживување на традиционалното пасење. Површината на пасиштата во областа беше преполовена од 1960 до 2000 година. Во рамките на Националниот парк „Казентинези“, од 1950 до 2020 година, пасиштата се намалија за повеќе од 80%. Ова се случи главно поради депопулацијата на планинските области и намалувањето на сточарската активност. Во изминатите 40 години, Италија загуби многу од своите овчари, што е тренд кој ги следи и другите европски земји. На Алпите бројот на земјоделци е намален за 40 отсто. Сепак, пандемијата на Ковид-19 уште еднаш ги откри предностите на сточарството и земјоделската работа. Италијанското здружение на фармери „Колдирети“ објави дека околу 2.000 млади луѓе неодамна одлучиле да се вратат на земјоделството и да се грижат за 7,2 милиони овци во земјата.
