Најголемите грчки синдикати повикаа на генерален штрајк што ќе се одржи на 14 декември против мерките за штедење предвидени со пакетот за помош на Грција, во моментот кога грчките власти влегуваат во нова рунда на преговори со меѓународните кредитори.
Синдикатот на вработените во државниот сектор повика на штрајк за да можат вработените да го искажат незадоволството поради намалувањето на платите и пензиите и да побараат зголемување на примањата и вработувањата во јавниот сектор, пренесува агенцијата АП.
Грчките власти сукцесивно ги намалуваа потрошувачката и платите, истовремено подигнувајќи ги даноците и ограничувајќи го вработувањето во јавниот сектор, за да ги исполнат барањата од меѓународните пакети за помош.
Актуелната програма за помош би требало да биде завршена во август 2018 година, после што Грција би морала самостојно да се финансира со продажба на државни обврзници.
Денешните преговори во Атина со меѓународните кредитори се фокусирани на реформа на пазарот на енергија, а двете страни очекуваат дека до крајот на годината ќе ги заклучат преговорите.
