Непознат извршител, кој веќе два пати испратил бомба во пакет преку германскиот сервис за достава на пратки ДХЛ, побарал откуп од десет милиони евра и се заканил дека ќе продолжи да испраќа бомби ако неговото барање не биде исполнето, дознава германски Билд.
Во заканувачкото писмо, кое во вид на QR код го испратил во последниот пакет, „испраќачот“ бара парите да му се уплатат во криптовалутата биткоин, која е заштитена од лажирања и ја чува анонимноста на сопственикот и примачот.
Пакт со бомба стигнал минатиот петок на адреса на аптеката „Кенигин Луизе“ во Потсдам, но аптекарот ја препознал заканата и повикал полиција, а властите за секој случај го евакуирале божикниот пазар во тој град.
Претходно, пред отприлика еден месец ист таков пакет примил сопственик на продавница за електроника во Франкфурт.
Бомбите со механизам за активирање на батерии биле направени од барут од Полска кој е забранет во Германија, со шајки и со шрафови. Планот бил да експлодираат откако некој ќе го отвори пакетот, но за среќа не функционирале.
Во истрагата за случајот учествуваат 50 полицајци од Бранденбуршката криминалистичка служба.
