Огромно мнозинство парижани вчера изгласаа забрана на електричните тротинети на улиците на француската престолнина, на необврзувачки референдум што градските власти рекоа дека ќе го следат.
За забраната гласаа помеѓу 85,77 и 91,77 отсто граѓани во 20-те париски окрузи, се наведува на веб-страницата на градската управа на Париз.
Гласањето беше наведено како „јавна консултација“ и предизвика долги редови пред гласачките кутии во градот.
„Гласав против затоа што во Париз е хаос“, изјави железничкиот работник Ибрахим Беутчутак (47) за „Ројтерс“.
„Начинот на кој е организирано и опасноста што ја создаваат, се сериозни проблеми“, рече тој.
Градовите ширум светот ги заоструваат прописите за електричните тротинети, ограничувајќи го бројот на оператори, брзината и местата за паркирање.
Во 2021 година, во Франција во несреќи предизвикани од тротинетите загинаа 24 лица, вклучително и едно во Париз.
Минатата година во тој град се евидентирани 459 сообраќајни несреќи со овие и слични возила, меѓу кои и три несреќи со смртни последици.
„Во нашата работа гледаме многу сообраќајни несреќи предизвикани од тротинети, така што навистина ги гледаме негативните ефекти“, изјави 38-годишната докторка Одри Кордие за „Ројтерс“ откако гласала против.
Електричните тротинети до кои се пристапува преку апликации за паметни телефони во Париз се користат од 2018 година, но после поплаките за нивно анархично користење, Париз во 2020 година го намали бројот на оператори на три.
Градот им даде тригодишен договор, бараше брзината да се ограничи на 20 км/ч и одреди места за паркирање. Сегашните договори важат до септември.
Операторите понудија дополнителни прописи, вклучително и проверка дека корисниците се постари од 18 години, ставање на регистарски таблички за да може полицијата да ги идентификува сообраќајните прекршители и ограничување на еден патник.
Вчера операторите се ангажираа за да ги охрабрат корисниците да гласаат против забраната.
Некои гласачи рекоа дека претпочитаат построги регулативи отколку целосна забрана.
„Гласав ‘за’ затоа што сум против прилично бинарниот избор што го добивме на овој референдум. Не сакам возачите на тротинети да прават што сакаат на тротоарите, но нивната забрана не е приоритет“, рече 35-годишниот Пјер Векерле.
