Пожарот во атарот на селата Требовље и Растеш се уште е активен. Во гаснењето се ангажирани припадници на армијата на Македонија, месно население и доброволци од Кичево, Прилеп и Скопје.
За дејствување на пожарот во Растеш се ангажирани вработени во Шумското стопанство „Сандански“ од Македонски Брод. Тие преземаат активности за локализирање на огнот, за тој да не се приближи до куќите и шталите со стока кои се во подножјето на селото и спречување на пожарот во месноста викана Коритски Дол.
Лица од ШС „Сандански“ ангажирани се и на гаснење на пожарот во село Девич. Пожарот е под контрола и со намален интензитет на месноста викана Попец.
Во атарот на село Могилец, пак, во гаснење на пожарот што избувна утринава околу 7 часот дејствуваат припадници на Територијална противпожарна единица од Македонски Брод.
Пожарот во атар на селото Близанско, на месностите викани Брдо и Круша, повторно се активира и се движи кон месноста Фојник и постои опасност доколку не се стави под контрола да префрли на атарот на селото Брест.
Гасењето на пожарите го отежнуваат високите температури и присуството на ветар.
