Генералниот секретар на Обединетите нации Антонио Гутереш ги повика страните во судирот во Јемен да ги прекинат сите копнени и воздушни напади и побара враќање на испораките помош во таа земја затоа што „милиони деца, жени и мажи се во ризик од масовна глад, од болести и од смрт“, јавува Ројтерс.
Како што пренесува британската агенција, повикувајќи се на извори од официјални лица на хуманитарни организации, Обединетите нации се обидуваат да евакуираат најмалку 140 хуманитарци од престолнината на Јемен, среде борбите поради кои е пресечен патот кон аеродромот, но чекаат одобрување од коалицијата на чело со Саудиска Арабија.
Други извори, пак, наведуваат дека ОН и невладините организации планираат намалување на хуманитарниот персонал во Јемен поради моментната безбедносна состојба.
Коалициските авиони ги бомбардираа местата каде што се стационирани Хутите во Сана, минатата вечер, навеле жители и локалните медиуми, а целта на нападите била пружање на поддршка на приврзаниците на поранешниот претседател на Јемен, Али Абдулах Салех, во борбите против Хута, групата која се сврстува на страната на Иран.
Ова е четврти ден од најновиот бран судири во кои се убиени повеќе десетици луѓе, соопшти меѓународниот Црвен крст.
„Во Џибути е подготвен авион за 140 членови на меѓународниот персонал“, изјавиле за Ројтерс официјални лица од ОН во Сана, додавајќи дека половина од персоналот потекнува од невладини организации.
Истите неименувани лица навеле дека борбите се поместуваат во правец кон аеродромот и дека состојбата е многу затегната, и тоа дека дури било и невозможно да се евакуираат хуманитарците.
Дозвола за слетување на авионот на аеродромот во Сана треба да издаде Коалицијата која го контролира небото над јеменската престолнина, која е во рацете на Хута, наведуваат хуманитарните работници.
Други извори од ОН во Јемен, меѓутоа, велат дека лицата од ОН и невладините организации не се евакуираат, туку дека е планирано намалување на бројот на хуманитарниот персонал во Сана додека безбедносната состојба на теренот не се стабилизира.
Тоа го потврди и портпаролката на Меѓународниот комитет на Црвениот крст во Женева, Елоди Шиндлер, велејќи дека Комитетот во моментната „хаотична ситуација ја разгледува можноста за намалување на бројот на своите лица во Јемен на најнеопходните членови“.
