Ракометните репрезентации на Франција и Данска ги вкрстија копја во големото финале на светското првенство за ракометари. Фантастичниот натпревар во Стокхолм, борбата на „живот и смрт“, заврши со победа на Данска од 34:29.
Првото полувреме донесе одлична претстава, а скандинавската селекција, од почетниот па се до последниот напад во првото полувреме, имаше предност.
На средината на првото полувреме достигна максимални +5, а на семафорот стоеше 12:7.
Тренерот Жиле реагираше со тајм-аут и луто ги повикува играчите на клупата, а нивниот одговор беше импресивен.
Токму од тој момент на паркетот се вратија сосема различни „триколори“.
Ремили го повлече целиот тим и со страшни удари ја „кинеше“ мрежата на Холм.
На неговите крила Франција од напад во напад ја топи предноста на противникот, за на полувремето да се оди со само -1, 15:16.
Само што започна второто полувреме, Мем испрати проектил од скок-шут, и Французите дојдоа до израмнување.
Тоа беше најава за голем кам-бек, но она што следеше беше страшен одговор од Данска.
Лауге и Питлик правеа чуда и го решетаа голот на Жерар. Следеше серија од 4:1 од скандинавскиот тим, а предноста од три гола избраниците на Јакобсен со цврста одбрана ја одржуваа до две минути пред крајот.
Гидлик испрати бомба со која носи недостижни +4, а голманот на Данска му фати седмерец на противникот и тогаш стана се јасно.
Светот доби трикратен последователен светски шампион – Данска. Најефикасен на финалниот меч беше „нестварниот“ Лауге со 9 гола, и тоа од 10 удари кон противничкиот гол. Неговиот сонародник Питлик постигна 8, а Ремили со 6 и Мем со 5 беа најефикасни во поразениот состав.
(Фото: Танјуг)
