Речиси 47 милиони Французи денеска избираат во вториот круг од парламентарните избори нов состав на парламентот.
Партијата чиј предводник е Емануел Макрон, „Републиката во движење“, во првиот круг освои 32,32 отсто од гласовите, десничарските Републиканци имаа 21,56 отсто, а екстремно десничарскиот Национален фронт 13,20 отсто гласови.
Социјалистите кои до неодамна беа на власт, освоија 9,51 отсто од гласовите, помалку од радикалната левица која заедно со комунистите доби 13,74 отсто гласови.
Париски „Монд“ оценува дека „Републиката во движење“ после изборите нема да има силна опозиција поради поделбата внатре во традиционалните партии, на левицата и десницата, во кои постојат струи кои ќе ги поддржат најавените реформи на претседателот Макрон.
Радикалната левица која сака да биде „прва опозиција“ можеби нема да има доволно гласови за да формира пратеничка група, додека екстремната десница, според анкетите, ќе освои четири места во парламентот, наведува „Монд“.
Вкупно 66.546 гласачките места ќе бидат отворени во 8.00, а затворени во 20.00 часот, после што, набрзо по затворањето, ќе се очекуваат првите излезни анкети од изборните места.
Изборите ќе бидат одржани со силни мерки за безбедност. Во целата земја се распоредени дополнителни 50.000 полицајци и жандарми.
Во Франција е на сила вонредната состојба воведена во 2015 година после бранот терористички напади во кои настрадаа 239 лица.
