Фондацијата „Со срце за Крива Паланка“ го продолжи рокот на конкурсот за избор на најубава фотографија на тема „Убавините на Крива Паланка и околината“.
Целта на конкурсот е да се соберат фотографии од Крива Паланка и неговите убавини со цел промоција и развој на туризмот, а истите ќе бидат интегрирани во промотивна веб-страница за туристичка промоција на општината.
„Ги повикуваме сите жители на градот, сите туристи, посетители, случајни минувачи што ја посетуваат Крива Паланка, да учествуваат на овој натпревар, да објават слика од Крива Паланка и околината на Фесјбук профилот на фондацијата со хаштаг #УбавинитеНаКриваПаланка. Ве покануваме да ги овековечите убавините на прекрасната природа и знаменитости на Крива Паланка и да ги споделите. На конкурсот може да се објавуваат фотографии со каков било мотив што јасно без опис даваат слика и претстава за Крива Паланка. Фотографиите може да бидат направени со телефон, фото-апарат или дрон, под услов сликите да се со добра резолуција“, информираат од организацискиот одбор на Фондацијата „Со срце за Крива Паланка”.
Фотографиите може да се објавуваат најдоцна до 15-ти септември 2019 година, по што најдобрите ќе бидат наградени.
Секој учесник може да прати најмногу три фотографии, а фотографијата треба да биде авторска т.е. да не е плагијат или копија.
Пријавените фотографии ќе ги разгледува и оценува стручна жири комисија од експерти во областа на фотографијата и уметноста.
