Фудбалската репрезентација на Србија го победи вечерва во Белград Луксембург со 3:2 во деветото коло од Групата Б во квалификациите за Европското првенство.
Србија со победата над Луксембург ги задржа теоретските шанси да се најде на континенталниот шампионат следната година, затоа што на едно коло пред крајот го завзема третото место во Групата Б со 13 бодови, еден помалку од Португалија која со 6:0 ја совлада Литванија.
На екипата на Љубиша Тумбаковиќ за пласман на Европското првенство ќе и биде потребна победа против првопласираната Украина за три дена, но и Португалија да загуби од Луксембург.
Головите за победата на Србија ги постигнаа Александар Митровиќ во 11 и 43 минута и Немања Радоњиќ во 70-тата. Погодоците за гостите ги постигнаа Жерсон Родригес во 54-та и Давид Турпел во 75 минута.
Србија против Луксембург од трибините на стадионот „Рајко Митиќ“ имаше поддршка само од деца на возраст до 14 години, заради суспензијата која Европската фудбалска унија му ја изрече на српскиот Фудбалски сојуз.
Домаќинот пред околу 2.000 гледачи во Белград добро го започна натпреварот и веќе во воведните минути имаше неколку добри шанси преку Митровиќ, но мрежата на Луксембург остана недопрена.
Состојбата сепак се промени во 11 минута кога Митровиќ на втората статива искористи добар центаршут на Душан Тадиќ и ја доведе Србија во водство.
Во ист ритам продолжи средбата, а домаќинот редеше прилики пред голот на Антонио Морис, но дури во 43 успеа да ја зголеми предноста.
Овој пат Митровиќ после еден одличен соло продор и шут од околу 20 метри го совлада Морис.
Почетокот на вториот дел од натпреварот му припадна на Луксембург, а после добрата акција по левата страна Жерсон во 54 минута го намали резултатот, за во 70 минута Радоњиќ повторно да ја доведе екипата на Тумбаковиќ до предност од два гола.
Конечниот резултат на стадионот „Рајко Митиќ“ го постави Турпел во 75 минута и тоа после добар контранапад.
(Фото: blic.rs)
