Ерупцијата на вулканот Етна и сериозните нарушувања во воздушниот сообраќај предизвикаа загуби од околу 24 милиони евра за туристичкиот сектор на Сицилија, покажуваат проценките на трговското здружение „Асоезерченти“ (Assoesercenti).
Аеродромот „Катанија-Фонтанароса“ останува затворен до 2 часот во петок поради наталожениот вулкански пепел. Од петокот до вторникот, вклучувајќи го и 12 август, беа откажани околу 700 летови, додека повеќе од 400 други беа пренасочени кон останатите аеродроми или реорганизирани.
Најголемиот товар го преземаат другите сицилијански аеродроми: повеќе од 330 летови се пренасочени кон Палермо, над 100 кон Комизо и 22 кон Трапани. Самиот аеродром во Комизо исто така беше привремено затворен околу 12 часа поради вулканскиот пепел.
Десетици илјади патници се погодени од откажаните и пренасочените летови во самиот шпиц на летната туристичка сезона, а многумина од нив беа принудени да користат автобуски и железнички превоз за да го напуштат островот.
Засега нема знаци дека ситуацијата наскоро ќе се нормализира.
– Не можеме да знаеме колку долго ќе продолжи активноста на Етна – изјави Стефано Бранка, директор на Одделот за вулканологија при италијанскиот Национален институт за геофизика и вулканологија (ИНГВ). Тој објасни дека системите за набљудување овозможуваат да се предвиди почетокот на вулканската активност, но не и нејзиниот крај.
За воздушниот сообраќај одлучувачка е насоката на ветрот. Облакот од вулкански пепел веќе се прошири до Малта и Северна Африка, а додека воздушните струења го насочуваат кон југ и кон аеродромот во Катанија, прекините на летовите веројатно ќе продолжат.
На аеродромот „Катанија-Фонтанароса“ во меѓувреме ситуацијата донекаде се смири по хаотичните сцени во изминатите денови. Операторите соопштија дека работат заедно со властите, цивилната заштита и другите аеродроми на Сицилија за да обезбедат што е можно поголем капацитет за авиокомпаниите и да им помогнат на блокираните патници.
Кризата повторно го отвори и прашањето за ранливоста на еден од најважните аеродроми во јужна Италија поради неговата близина до најактивниот вулкан во Европа.
– Не е Етна на погрешно место, туку аеродромот – изјави италијанскиот министер за цивилна заштита Нело Мусумечи. Како поранешен претседател на покраината Катанија, Мусумечи и претходно предложи да се разгледа можноста аеродромот да биде преместен на нова локација меѓу Катанија и Ена.
Опозицијата на Сицилија, пак, ги насочи критиките кон начинот на кој регионалните власти управуваат со кризата. Лидерот на сицилијанските социјалдемократи, Ентони Барбагало, ги оцени постапките на регионалната влада како „некомпетентни и недоволни“.
