Европската Унија реши да ослободи 140 милиони евра помош за задоволување на основните егзистенцијални потреби на Авганистанците во областа на образованието, здравството и земјоделството и за економско зајакнување на жените во Авганистан.
Одлуката за ослободување на средствата, замрзнати во декември 2022 година како реакција на одлуката на талибанските власти да им забрани на авганистанските жени да работат во невладини организации, доаѓа по шестмесечна анализа за утврдување на начините што ќе гарантираат дека помошта ќе стигне до оние на кои им е наменета.
Еврокомесарката за меѓународни партнерства, Јута Урпилаинен, која се наоѓа во Њујорк како дел од делегацијата на ЕУ што учествува во работата на Генералното собрание на ОН, изјави дека во последните шест месеци меѓународната заедница нашла начин како да ја достави „очајно потребната поддршка за жените, девојките и другите ранливи групи“.
– Беше тешко да се најде начин во се потешката ситуација во Авганистан. Сепак, овој начин нуди решенија за помош за егзистенција за милиони лица, а притоа де факто не ја признава власта на Талибанците, рече Урпилаинен.
Според најавата од ЕК, средствата на ЕУ ќе продолжат да се доставуваат преку агенциите на ОН, Светската банка и меѓународните невладини организации кои работат на терен во Авганистан. – Финансиската поддршка има за цел да обезбеди помош за основните потреби на авганистанскиот народ во пресрет на загрижувачките предизвици со кои се соочуваат во земјата, се додава во соопштението.
Извор/Фото: МИА
