Десет лица загинаа во невремето во Украина, изјави денеска министерот за внатрешни работи Ихор Клименко, а жртви се пријавени и во Русија и Молдавија.
Студени ветрови и бури од неделата ја опустошуваат јужна Украина, блокирајќи ги патиштата и предизвикувајќи прекин на електрична енергија.
„Десет лица загинаа во областа на Одеса, Харков, Миколаев и Киев“, напиша Клименко на Телеграм.
„Дваесет и три лица се повредени, меѓу кои и две деца“, додаде тој.
Вкупно 411 населени места во 11 региони се без струја, а луѓе морале да бидат спасени од повеќе од 1.500 возила.
Во руските медиуми наречено „бура на векот“, жестокото невреме кое однесе неколку животи од неделата пустоши во јужните региони на Дагестан, Краснодар и Ростов.
„Рускиот претседател, Владимир Путин, ги следи извештаите за ‘метеоролошките катастрофи’ и веќе и нареди на владата да преземе мерки за помош на погодените региони“, изјави портпаролот на Кремљ, Дмитриј Песков.
Рускиот министер за енергетика информираше дека 1,9 милиони луѓе останале без струја.
Огромни бранови ги заплискуваат области на рускиот брег на Црното Море, според видеата објавени на социјалните мрежи, додека брзината на ветерот на некои места достигнала и преку 140 километри на час.
Две тела се пронајдени во јужниот руски регион Краснодар, додека државните медиуми јавија дека еден морнар загинал во Керченскиот теснец меѓу Крим и Русија.
Во Молдавија се пронајдени тела на две лица во автомобил затрупан од снежни наноси во југоисточниот регион Коскали, објавија молдавските медиуми.
(Фото: Служба за спасување на Украина/АФП – Макс Ветров/Спутник)
