Гласачите во Канзас вчера го отфрлија обидот за отстранување на заштитата на правата за абортус од државниот устав на гласачките места, во првото гласање за правата на абортусот откако Врховниот суд на САД го отфрли Роу против Вејд.
Жителите на Канзас гласаа за амандман поврзан со пресудата на Врховниот суд од 2019 година, со која се гарантира правото на абортус, моментално до 22-та недела од бременоста. Парламентот на таа сојузна држава со републиканско мнозинство по таа одлука поднесе амандман за отфрлање на тоа уставно право, со цел управувањето со работата да се врати во контрола на претставниците.
Законодавниот дом на Канзас нема да може да донесе ограничувања на правото на абортус во таа сојузна држава.
По пребројувањето на 98 отсто од гласовите, против амандманот се изјаснија 59 отсто од гласачите, а го поддржаа 41 отсто. Тоа значи дека парламентот во Канзас со републиканско мнозинство нема да може да донесе ограничувања на правото на абортус во таа конзервативна сојузна држава, каде пациентите пристигнаа од блиските Тексас, Оклахома и Мисури, каде што абортусот е целосно забранет.
По овие резултати, демократите се охрабрени дека прашањето за абортусот на среднорочните избори во ноември ќе ги привлече гласачите на нивна страна, иако тие се загрижени за зголемената инфлација.
„Ова треба да биде повик за будење за противниците на абортусот“, рече Нил Ален, политиколог од Универзитетот во Вичита. „Кога целосната забрана ќе стане реална можност, ќе имате многу луѓе кои излегуваат на гласање и ќе изгубите многу поумерени поддржувачи на ограничувањата за абортусот“, додаде тој.
Бајден: Повеќето Американци се согласуваат дека жените треба да имаат пристап до абортус.
Ова гласање во Канзас е прво од неколкуте во САД каде државите ќе одлучуваат за прашањето на абортусот. Кентаки, Калифорнија, Вермонт и можеби Мичиген ќе излезат на гласање наесен. Претседателот Џо Бајден им се придружи на демократите низ целата земја во пофалбите за резултатите во Канзас.
„Ова гласање го покажува јасно она што го знаеме: Мнозинството Американци се согласуваат дека жените треба да имаат пристап до абортус и да имаат право да носат свои здравствени одлуки“, рече Бајден.
Анкетата објавена во февруари од Универзитетот Форт Хејс покажа дека мнозинството жители на Канзас не поддржуваат целосна забрана за абортус. Околу 60 отсто не се согласуваат дека абортусот треба да биде целосно незаконски, а 50,5 отсто од нив рекле дека владата во Канзас не треба да поставува никакви регулативи за околностите под кои тие се вршат.
