Индија го забрани извозот на бел ориз со закон кој веднаш стапи на сила, доцна во четвртокот, што е последен во обидот на владата да ги запре покачувањата на цените на храната.
Министерството за заштита на потрошувачите соопшти дека забраната ќе помогне да се обезбеди „соодветна достапност“ на белиот ориз во Индија, како и „да се ублажи растот на цените на домашниот пазар“.
Индија е водечки светски извозник на ориз, со повеќе од 40% од глобалната трговија, како и втор најголем производител по Кина.
Аналитичарите за Си-Ен-Би-Си рекоа дека минатонеделната забрана би можела уште повеќе да ги зголеми и онака високите цени, засилувајќи ги ефектите од септемвриската забрана за испорака на скршен ориз во земјата.
Глобалните залихи на ориз драстично би се намалиле, сметаат повеќето од нив, со оглед дека земјата е втор по големина светски производител на основна храна.
Бангладеш и Непал најверојатно ќе бидат најтешко погодени од забраната, бидејќи и двете земји се главни извозни дестинации.
Со намалувањето на глобалната понуда на ориз, паничните реакции и шпекулациите на светските пазари за ориз би го влошиле растот на цените.
Забраната, исто така, може да ја влоши несигурноста на храната во земјите кои силно зависат од оризот, предвидува фирмата за земјоделска аналитика „Гро Интелиџенс“ (Gro Intelligence) во нејзиниот извештај објавен неодамна.
Освен намалувањето на глобалната понуда на ориз, реакциите на паника и шпекулации на глобалните пазари за ориз би ги влошиле зголемувањата на цените.
Цените веќе се движат кон повеќедецениски највисоки нивоа, делумно поради намалените резерви кога основната намирница стана атрактивна алтернатива додека цените на другите главни житарки скокнаа по руската инвазија на Украина во февруари 2022 година.
Цените на пченицата се зголемија минатата недела откако Русија се повлече од Црноморскиот договор за житарки.
Договорот имаше за цел да ја спречи глобалната криза со храната дозволувајќи и на Украина да продолжи со извозот.
Инфлацијата на оризот веќе се забрза од просечните 6% на годишно ниво минатата година на скоро 12% во јуни 2023 година.
Фјучерсите на суровиот ориз пораснаа за 1%, на 15,8 долари, по објавувањето на веста од Индија.
Јужноазиската нација се бори со високите цени на зеленчукот, овошјето и житарките. Цените на доматите во Индија се зголемија за повеќе од 300% во последните недели поради лошите временски услови. Анкетата на Ројтерс предвидува дека инфлацијата во земјата најверојатно ќе достигне 4,58 отсто на годишна основа поради растот на цените на храната.
Дел од аналитичарите предвидуваат дека светските цени на оризот дополнително ќе се зголемат поради уделот на Индија на глобалниот пазар. Тие сметаат дека цените би можеле дури и да ги надминат највисоките нивоа во вториот квартал кога грубиот ориз достигна ниво од 18 долари.
